(بيت كل المبدعين العرب)
 
الرئيسيةالبوابةاليوميةس .و .جبحـثالأعضاءالمجموعاتالتسجيلدخول

شاطر | 
 

 مشاركات الزجل لشهر ديسمبر 2018

اذهب الى الأسفل 
كاتب الموضوعرسالة
رئيس مجلس الإدارة
Admin
avatar

المساهمات : 195
تاريخ التسجيل : 09/02/2018
العمر : 50

مُساهمةموضوع: مشاركات الزجل لشهر ديسمبر 2018    الخميس ديسمبر 13, 2018 3:08 pm

مشاركات الزجل لشهر ديسمبر 2018

المشاركة رقم (1) زجل
============
...الفئة...زجل.....
......حياتي الزوجيه.....
حياتي الزوجيه.. علي طول زي ما هي..
مافيش فيها تغيير.. ما أحلي العزوبيه..
أصحي الصبح بدري.. أصلي الفجريه..
أفطر فول وفلافل..وبطاطس مقليه.
أطلع عالشغل دغري..وأرجع بعد الضهريه..
ألاقي المدام بتاعتي..طبخالي ملوخية..
عباره عن شوية شوربه..وعليهم طشة تقليه..
ومعاهم سدر فرخه..أوحتة لحمه مشويه. .
وعليهم نص رغيف..وتبقي لقمه هنيه..
كل وبس ماتشبع..وبعديها أنام شويه..
عايزاني أعمل ريجيم. .عشان حالتي الصحيه..
وقبل ما أنام.. أصلي الضهريه..
أنام شويه وأصحي.. أصلي العصريه. .
ألاقي المدام تقوللي..ذاكر لعيالك شويه..
أقولها يا مدام.. وأنتي وراكي إيه الساعه ديه..
تقول غسيل وطبيخ كل يوم..كفايه دول عليا..
أنا خلاص اتهديت..الرحمه ياناس شويه..
أقولها ما أنا زيك..تعبان يا وليه..
طول النهار في شغلي..عايز ارتاح شويه..
وبعد طول جدال..كلمتها تمشي عليا..
أقول تعالوا ياعيال..نذاكر الحبه ديه..
حكم القوي عالضعيف..ربنا ياخد الست ديه..
كان مالي ومال الجواز..كانت اتعمت عنيا..
ماكنت قاعد مرتاح..وجبت لنفسي رزيه..
المهم يا أحباب..وخلاصة الحكايه ديه..
مش عايز أطول عليكم..قولوا خليك شويه..
بعد ما أخلص مذاكرة.. أصلي المغربيه..
أقول خلاص هارتاح..تقوللي بص عليا..
أنا عايزه أروح لماما. .اقعد معاها شويه..
أنا مرحتش من زمان..بقالي أسبوع وشويه..
هات كام جنيه..اخد معايا هديه..
أقولها حرام عليكي..خفي إيدك عليا..
المصاريف بقت زياده..ومش هتكفي الماهيه..
تبكي وتنزل دموعها..وتقول ياعيني عليا..
أنا مكسورة الجناح..ومحدش بيحن عليا..
ألبس هدومي وأنزل ..علي الجامع أصلي العشيه. .
ادعي واقول يارب..ريحني منها شويه..
ولما أرجع تقوللي..هنتعشي إيه الليله ديه..
أقولها عايزه إيه..طلباتك أوامر عليا..
تقول بيض ولبن..وحتة جبنه طريه. .
وبيفي علي لانشون..وكام زتونه مخليه. .
وحفاضه للبيبي. .وميه معدنيه..
أقولها خلاص ياهانم..كفايه دول عليا..
أنا مش قاعد علي بنك..ولا بطبع نقديه. .
وهي دي حياتي..من الصبح للعشيه. .
مافيش فيها تغيير..ما احلي العزوبيه..

مصطفى محمدابوزمان
مصر



المشاركة رقم (2) زجــــــــــــل
==================
خاص بالمسابقة
محمد رجب محمود ابراهيم
المنوفية / مصر
زجل
___'"_((يا لطيف))_____'''''''''_''''''____
عفريت ف حياتى معفرتنى
*********ومشقلب حالى و ملغبطنى
قلبلى نهارى بقا زى الليل
***********والليل بقا ويل ومسهرنى
لا انا عارف انام ولا حتى أكل
*********ولا بقا لحياتى طعم ومعنى
اذا كان عفريت انا الإنسان
*****انا مش هسكت ولا اسيب حقى
وهجيبوا متكتف ابن الجان
************ويولع ويقول ارحمنى
أول ما قرأت سورة الاخلاص
**********قالى خلاص بس وسبنى
حرمت خلاص يابنى آدم
*******واعتقنى لوجة الله وصدقنى
كان مالى انا بس بالإنسان
خلاني فرجة ف وسط الجان
************والآخر بردو هيحرقنى




المشاركة رقم (3) زجـــــــــــــل
=================
الإسم محمد علي أبو النجاه
شهرته سلامه أبو النجاه
جمهورية مصر العربيه
فئة الزجل
نص بعنوان يوميات شاعر مفروس
‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘

بعد الكشف على المتعوس
النقاد كتبوله لبوس
كل لبوسه خابور بالفعل
ملعون ام كتابة الشعر
لما يكون من راس منحوس
سألوا الشاعر فين الاذن
فين القافيه فين الوزن
ليه الكرب ف كعب الحزن
دفنوا احلامنا ف قبر كابوس
رد وقال صبّرني يارب
مالنا ومال الكرب يا شعب
زينه الدنيا وزي الفل
و بلاش نفعص في المفعوص
النقاد نصبوا المتاريس
قفلوا القفل مع الترابيس
قالوا الشعر بدون ترخيص
فتنه سببها النوم بلبوص
هرب الشاعر بالتهميش
يطرح بيش من يك ف شيش
طلع الناتج قرش حشيش
كان مطلوب م الواد محروس
خلّوا الشاعر ساعة ضيق
قبل ما نعلن موته غريق
شد ف شعره وشخبط شعره
وبرم الورقه عملها لبوس
اول قرص ولبسه تمام
والايام تثبت يا كرام
إن الشعر الحر حرام
لما ينخور ع المدسوس
الاوجاع كلها زنازين
ايه راح يفرق بقى يا حزين
بين اموات لكن عايشين
عن احياء صوتهم محبوس
دخلت موزّه على الحلوين
سألت شيخ نقادكم فين
هبّ البيه من فوق كرسيه
قالها شعر والله شعر
قالت نظم الواد محروس
أسألكم لو فلتت مني
طلقه تلف ترد تصيبني
تشهدوا إني كتبت بدمي
يوميات شاعر مفروس
.................................
يوميات شاعر مفروس
سلامه أبو النجاه


المشاركة رقم (4) زجــــــــــــــل
====================
الاسم/سعد الشرقاوى
البلد/مصر
الفئة/زجل
النص/اوعه يا ولدي
إوعه يا ولدي..
اوعه صحاب السوء يا خدوك
وتكون قاسي ف يوم وتسيـبني
خوفي لا تكبر تنسى أبوك
أو يوم تنسى بأنك ابني
,,,
خوفي يا ولدي ف مرضي انداس
واللا أشوفك مش متحمّل
واللا توجّب عند الناس
وتيجي لحد أبوك وتهمّل
,,,
اوعاك تنسى طفولتك مرّه
واللا ايادي بلهفة شالوك
كانت العيشة ف عهدك مرّة
والايام بتــبهدل ابوك
,,,
خليك فاكر وانت صغيّر
كنـّا فى وسط الناس ماحيـين
وأمّا بتمرض أو تتغــيّر
رغم الفقر نبات صاحيـين
,,,
كنت تغيب عن عيني شويّه
تاخد قلبي وروحي معاك
ولولى عيون الناس حواليّا
كنت أتابعك وأمشي وراك
,,,
حلم حياتي أشوفك راجل
زين متربيّ وعنده أساس
وأنا اتباها واقول ايْوه ابني
وأفخر بيك قدّام الناس
,,,
نفسي أشوفك م الابطال
تحمي حدودك تحمي بلادك
تقهر كل عميل بطـّال
وان قتلوك ح يعيشوا ولادك
,,,
خايف يوم يبقالك شلـّه
واللا تصاحب حد خسيس
وأمّا بلادك تبقى ف محنة
تشمت على صفحات الفيس
,,,
لكن دايما ماسك قلبي
بإيدي وخايف م الايّام
لمّا احتاج لوجودك جنبي
ونفسي عزيزه وأنا منضام
,,,
خايف ييجي عليّا نهار
وألقى الدنيا ف لحظة عماتك
سايب ابوك بيموت فى الدار
وانت مصيّف عند حماتك
,,,
يكبر ألمي ونفسي أشوفك
والليّ بيشمت اقول له كفايه
وأقعد أحلـّل واحكي ظروفك
وارمي سنين العمر ورايه
,,,
آه من سيف الغدر يا وادي
لمّا بيـيجي من الغاليــين
يصبح لون الشمس رمادي
ويبات توب الفرْح حزين
,,,
والمغصوب يكدب على نفسه
وحبّه بحبّه يصدق روحه
والامراض تكتم على نفسه
وما فيش حد يداوي جروحه
,,,
وبعد ما كنت اتباهى بقربك
شادد حيلي وحافظ هيــبتي
أصبح خايف لو جات سيرتك
كل الخلق ح تكشف خيــبتي
,,,
خوفي يطوّل مرضي شويّه
وترعش ايدي وضهري يقوّس
والمشروب ينكب عليّا
ويبان شكل ابوك متلوّث
,,,
تقرف منيّ واشوفها بعيني
ناطقة بكل لغات الدنيا
يومها اتمنى الموت ما يجيني
وانا محتاجُه في نفس الثانيه
,,,
وصوتك يعلا وتشخط فيّا
وتبقى خلاص مش مستحملني
وبتـتمنى وتدعي عليّا
في سرّك عايز تخلص منيّ
,,,
مش راح اقول لك مرّه إدّيني
وعايز ربك يرضى عليك
ما انت حصادي ف كل سنـيني
وفنـيت عمري اكبّر فيك



المشاركة رقم (5) زجـــــــــــل
=================
خاص بمسابقة الابداع - فئة زجل الاسم / محمد عبد المحسن محمد - مصر غراميات شاعر النـــاس فـــاكرانــــي بــغنــــي

الناس فاكراني بغني وأنا بابكي وكلي جروح
ولا حد بسائل عني ولاعارف فين انا أروح
الفرحه تعدي عليه ألمحها يدوب بعنييه
وأستني وأقول أهي جايه أتريها حلوة روح

######

الناس فاكراني بغني وأنا بابكي وكلي جروح
غزلت من الصبر ضفاير وبهمي لمين أنا أبوح
ولبست ثوب الندامه ومشيت في طريق كله جروح
عيوني بتنزف دموع وصديد وقلبي بقه كله جروح

######
الناس فاكراني بغني وأنا بابكي وكلي جروح
والصبر بايه هيفيد وأنا جرحي ياناس بيزيد
مع دمعي سهرت ليالي والدمع بايه هيفيد
مستني الفرحه تجيني وترجع لي معاها ألروح

######
الناس فاكراني بغني وأنا بابكي وكلي جروح
يامركبي الشوم عدي وصلني لبرك يوم
غرقان والهم ماليني علشان مش قادر أعوم

######
الناس فاكراني بأغني وأنا بابكي وكلي جروح
مشواري بديته عذاب وهموم وطريقي بقه كله ضباب وغيوم
عديت نجوم الليل وعيوني تركه النوم
مستني الفرحه تجيني وترجع لي معاها الروح

كلمات / محمد عبد المحسن القزازي




_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://ebdaagroup.yoo7.com
 
مشاركات الزجل لشهر ديسمبر 2018
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
جمعية إبداع الثقافية :: المنتدى الأدبي :: منتدى الشعر-
انتقل الى: