فى فئة الشعر العامية :- ============== فاز بالمركز الأول مكرر الشاعر /أحمد حامد أحمد{ أحمد أبو عاصم }( مصر) بقصيدة(متاهات)

فى فئة الشعر العامية :-
==============
فاز بالمركز الأول مكرر الشاعر /أحمد حامد أحمد{ أحمد أبو عاصم }( مصر) بقصيدة(متاهات)
خاص بالتصفيات { فئة العامية }

# _ متاهات .. !!!

مش باقي مني غير سكات
ضاعت معالم ضحكتي .. !!!
أسماء كتير متبعتره
كل الوشوش متغيره
مابين شطوط الذكريات
تاهت بقايا فكرتي
حتى الآنين ...
بقى ليه شروط .. !!!
مكبوت ورافض للطلوع
نفس الآلام ... متكرره
والآهه لسه ف سجنها
والليل محاوط أسرها .. !!!

حتى النهار .. طالع بغيم
حاجب يطلع سرها
وانا لسه ع العهد القديم
غرقان ف بحر الإشتياق
بامضي الحضور والإنصراف
والسكه ماليانه انعطاف
مكتوب علينا سنين فراق
والعقل مش قابل نقاش
نفس المكان ...
من كااااااام سنه .. !!؟؟
مش راضي يحسب عدها
دايما يردد وِردها
حافظ بقايا وَردها
مابيّنَ طيات الأمل
رغم التناسي والهمل
يااااااا كل إحساس الملل .. !!!

الشمس ليه مالهاش شعاع .. !!؟؟
والضي ف معاده ماجاش
مين اشترى .. ؟؟
مين اللي باع .. ؟؟
مين اللي دايما ف انصياع
وقيودي لسه ف معصمي
مرهون ف سجني المحتمل
يأس احتواني واشتمل
كل انفعالي والردود
مفروض عليا كتير حدود
وانا اللي قابل فرضها
حابب مذاقها ومرها
بقى عادي ليا ومستساغ
ولسه خاضع للفراغ .. !!!

أدمنت خبطي علی البيبان
عاشق لأنقاض المكان
والروح ف حالة انسجام
مع كل أشكال الوثن
ريحة العطن ...
وبقايا من بعد الهدد
رافضه المدد ...
سابحه ب خَدّر ...
طالبه السفر
جوا مدار الإنعدام ... !!!

رغم الخطر ...
سامعه الآدان
وبشريات لهطول مطر .. !!!

بقلمي أحمد حامد أحمد { أحمد أبو عاصم } / مصر