القصيدة الفائزة بالمركز الثانى م فئة الشعر العامية الشاعر /أحمد سيد أحمد / مصر

شعر باللغة العامية بعنوان
(حلم)
أحمد سيد أحمد / مصر
**********
كان فيه زمان
بنوته لفت شعرها بشريط حرير
ف الحلم شافت نفسها ويا الأمير
و الفرح ساكن قلبها و الناس كتير
متجمعين تحت السما
كل القلوب متبسمة
و الفرحة كات متقسمة
ف الكون تطير
الدنيا حضن يضمهم
و السعد ساكن قلبهم
و الحب راسم فرحهم
ويا العبير
الحلم مليان بالهوى
فيه القلوب رقصت سوى
و لكل داء كان فيه دوا
و الكل للأفراح أسير
الفرح جوه الحلم طال
لكنه يتحقق .. محال
د كأنه قصر من الرمال
عالى و كبير
الحلم ويا الشمس راح
و الفجر غطاه لما لاح
و البنت قامت فى الصباح
مالقتش غير حضن السرير