علامة تعجب !!!! ========== السيد محمد صابر

علامة تعجب !!!!
==========
السيد محمد صابر

مافيش بينا شئ أصلا
ولا بسهر ولا أتألم
ولا باحلم في يوم بيكى
ولا فى الهجر بتكلم
رسمتى لوحة فى خيالك
وقولتى الخلق تتعلم
من قصة حب حراقة
وقولتى مسيرى راح أسلم
صبرت عليكى كتير ياما
لكن دلوقتى هتكلم
سنين مرت وأنا ساكت
واقول بكره أكيد هتفوق
ويوم عن يوم تروح منك
وحالتك ليه ما راضية تروق
بشوف ف عنيك كتير غيرة
وانا من غيرتك انا مخنوق
ااقول يمكن ف يوم تفهم
حدود بنا كتير قايمة
لقيتك عايشة دور ليلى
وليل ونهار كدا عايمة
فى وهم عشش كدا ف عقلك
فى حلم صعب يتحقق
ومهما قولت ف يوم ليك
كلام لابد يتصدق
ودانك سامعة صوت شيطان
عايزنى فى بحرك انا أغرق
ف لحظة ضعف كان غلطى
قولت كلام بيرضيكى
وقولت اعيش فى الاوهام
قصدى كان اهديك
لقيته للجميع منشور
بيحكى انى بدوب فيكى
طب فين حبك المزعوم
وفين الشوق وألامه
وفين الصدق فى كلامك
فى رب هتقفى قدامه