ريشة فى مهب الريح ... من ديوان أحلام شاعر السيد محمد صابر

ريشة فى مهب الريح
============
لا مجنى عليه ولا جانى
و انا عايش ع الهامش
وقلبى تملى خلانى
كما الريشة ف عز الريح
أجرى عليكوا بالمشوار
أوام أرجع بقلب جريح
وحتى لما أتململ
وأتألم وأقول الأه
بتمنعونى من التصريح
واعيش ليلى جماد ساكن
وجوايا سواد داكن
وحزن كبير وشوق جارف
وقلب أصيل لكن خايف
وأعمى كمان ماهوش شايف
طريقه منين
وتمر سنين وراها سنين
ويفنى العمر عن أخره
مايبقى غير يادوب ساعتين
الاقى الدمعة فى عيونكم
ونظرة حزن جواها
وتنهيدة بطعم مرار
كأنى كنت وياكم ....
كأنى كنت صحيح عايش
مابين أهلى وخلانى
ولا عمرى كنت ع الهامش
ولا قلبى تملى خلانى
كما الريشة ف عز الريح
وأسمعكم بتدعولى
تفوت ساعة وأنا مذهول
وأقول لنفسى معقولة
ترد تقولى مش معقول
سنين العمر خلاص مرت
وباقى منه يادوب لحظات
وقبل ما ينتهى قولها
أسمعها منهم بصوت عالى
خلاص فاتنا .. خلاص
ماااااااااااااااااااااااات
=================