فى فئة الشعر العامية :- ============== فاز بالمركز الأول الشاعر /عبدالله علي نظير (مصر )بقصيدة (طــــعم العرق)

فى فئة الشعر العامية :-
==============
فاز بالمركز الأول الشاعر /عبدالله علي نظير (مصر )بقصيدة (طــــعم العرق)
الأسم / عبدالله علي نظير
مصر
شعر عامية
إسم العمل (طــــعم العرق)

طعم العرق
******
كتر الشقى بيولد التجاعيد
تولد كعوب الشقيانين بصمات
وكل خطوة وليها فيش معروف
بس النهاية ع القفيش واحدة
مهما الحواية إتعصبت م الشيل
الحمل نفس الوزن ف التوزيع
لو قولنا راح نحسبها بالقراريط
رطل الضعيف أردب للأقوى
ريحة الخبيز بتشبعه م الجوع
ربك بيشفي الفقري من رقوة
ودعوة خالصة تكرر المنقوع
طعــم العـــرق بيبلع اللقمة ...
وأهو عيش وملح والف حمد ونام
صافي مصفي من الرصيد والسيط
صابر بصرة صبر واستعفاف
عاف العكوف واستعفى واستكفى
وبكفُه كيف كيفه ع اللي كفاه
فيه اللي فيه ما فاتِحش فيه مخلوق
خاشع بخشية ومبتغاه أغراه
رغبة ف غني يغنيه عن المغرور
اللي بغناه ماغنيش ولا استغى
ولا فاهم المعنى اللي أغنى فقير
ف يغيرمن الضحكة اللي فاشخة الخد
ويغير من الهدمة اللي ساترة الحد
ويغير من الكف اللي داير كد
ويغير من الحد اللي ما سألهوش
ويغير من العرق اللي ما عرقهوش
طعم العرق بالنسبة ليه محصور
بين هز وسط بريحة الڤوتيكا
أو جوة چامينزيم بريحة الكرش
عمره ما داق طعم العرق ع القرش
ف ماتفتكرش الحسبة فيها خلاف
الفرش نفس الفرش لو يتشاف
أهو جلد ،دم ولحم ... كسوة عظم
والفرق بس يدوب ف ريحة وطعم .