فى فئة الشعر العامية :- ============== فاز بالمركز الأول مكرر الشاعرة /اميمة محمد علي(أميمة سلطان )( مصر)بقصيدة(بدر وشمس )

فى فئة الشعر العامية :-
==============
فاز بالمركز الأول مكرر الشاعرة /اميمة محمد علي(أميمة سلطان )( مصر)بقصيدة(بدر وشمس )
اميمة محمد علي (أميمة سلطان )
جمهورية مصر العربية
قصيدة عامية
بدر وشمس
..............
الجمعه ..
كان أول لقا
ساعة العصاري بدون كلام
البنت عينها معلّقه
والواد عينيه فيهم هيام
لغة المشاعر فضفضت
من غير حروف وسط الزحام
شاور لها بنظرات عينيه
ردّت بسرعه أوام عليه
نفس المكان ح تشوفني فيه
قالت كده وشاورت سلام
والجمعه فات
السبت ..
كان قاعد هناك
قبل الميعاد بساعات كتير
جايب ورود من كل نوع
وف كل نوع أجمل عبير
جت تبتسم له من بعيد
قلبه انتفض عايز يطير
مد لها إيد مدت له إيد
وكأن نار بدأت تقيد
كان كل شئ فعلا جديد
بين الأميره والأمير
والسبت فات
الحد ..
راح نفس المكان
والبنت قبله ف انتظار
معذوره دا الحب الجميل
بيخلّي برد الدنيا نار
قالت كتير وسمع لها
فضفض لها لأخر النهار
أجمل كلام يتقال بهمس
كل الحروف حرفين وبس
كان هوّ بدر وهيّ شمس
إتوحّدوا ف نفس المدار
والحد فات
لتنين ..
فاجئها بكلمته
يا حبيبتي طالبك ف الحلال
بان الكسوف على وشّها
دارت كسوفها بالدلال
قال بكره جي وح اطلبك
زاد حُسنها وزادت جمال
واتفقوا يصبح عشّهم
يمكن بسيط على قدّهم
يكبر بإخلاص عشقهم
ويحققوا فيه الأمال
واليوم دا فات
يوم التلات ..
خد أهله راح على أهلها
كان قلبه من قبله هناك
وشافوها أهله ف وقتها
خجلانه قعدت ف ارتباك
تم اتفاق على كل شئ
وقالوله.. دي فعلا ملاك
بكره الدبل تيجي وأكيد
يوم الفرح رح يبقى عيد
شاور ومسّى من بعيد
ردّت بشوق يسعد مساك
واليوم ده فات
الأربعاء ..
كان يوم جميل
جابوا الدبل واتمشّوا فيه
الأهل ويّاهم أكيد
بس الجمال إيدها ف إيديه
طعم البراءه ف مهدها
إحساس مافيش حد يلاقيه
بكره الفرح والإنشراح
والجي أجمل م اللي راح
عش الغرام ح يكون براح
والعشق رح يتهنّوا بيه
واليوم دا فات
يوم الخميس ..
كان كل شئ أبيض جميل
والجو أصفى من الحليب
كان قلبها طاير وكان
أكبر مكان فيه للحبيب
بس الحبيب غاب عنّها
مش واخده ف ميعادهم يغيب
حسّت بشئ ف الحلق مُر
والقلب م الحزن اتعصر
بعد الساعات جالهم خبر
تليفون أبوه ومعاه طبيب
البدر مات
......بقلم ،،،،
اميمة سلطان